Մարզերում փաստաբանների վիճակն իսկապես վատ է. Արա Զոհրաբյան

Այսօր ՀՀ Փաստաբանների պալատի նախագահ Արա Զոհրաբյանն ասուլիս էր հրավիրել` ամփոփելու համար իր պաշտոնավարման 100 օրը: Հանդիպմանը նախագահը հրավիրել էր նաև ՓՊ նախագահի նախկին թեկնածուներ Կրոմվել Գրիգորյանին և Տիգրան Աթանեսյանին, վերջինս, սակայն, գրավոր տեղեկացրել էր, որ չի կարող մասնակցել:

«Պալատում ստեղծվել է մի թիմ, որն ի զորու է հաղթահարել իր առջև դրված խնդիրները»,- ասաց Զոհրաբյանը և թվեց այն բոլոր ծրագրերը, որոնք իրագործվել են իր պաշտոնավարման ընթացքում:

«Այսօր ցանկացած կառույցի կարևոր մասը որակյալ կադրերն են, ոչ արհեստավարժ կադրերը չարիք են պետության համար»,- նշեց նա:

 ՓՊ նախագահը կարևորեց նաև փաստաբանների և պալատի անմիջական կապը, ըստ նրա`  պետք է հասնեն նրան, որ փաստաբանները միայն անդամավճարները վճարելու համար չգան պալատ:

Անդրադառնալով մարզային փաստաբաններին`  Զոհրաբյանը նշեց, որ մարզերում նրանց վիճակն իսկապես վատ է` չունեն գրասենյակներ, երբեմն գործեր են կատարում` բնամթերքով վարձատրվելով և այլն: Նա նշեց, որ քայլեր են մշակվել նրանց մարզերում գրասենյակներ տրամադրվելու ուղղությամբ, բացի այդ`  այսուհետ կլինեն նաև մարզային համակարգողներ:

Խոսելով ԼՂՀ-ի փաստաբանների մասին` Զոհրաբյանը նշեց, որ նրանք պետք է վերապատրաստվեն և սովորեն մեր փաստաբանական դպրոցում, ինչի համար մտադիր են ներառել նաև հեռակա ուսուցման մոդել: