Զախարյանը Քոչարյանի դեմ չի խոսի

Երեկ լրագրողական հանրությունը զարմացած էր` ըստ կառավարության պաշտոնական կայքի` ասուլիս էր տալու ՀՀ կառավարությանն առընթեր անշարժ գույքի կադաստրի պետական կոմիտեի նախագահ Երվանդ Զախարյանը: Նա, ըստ կառավարության տարածած հաղորդագրության, խոսելու էր 2014 թվականի գերակա խնդիրների եւ ծրագրերի մասին:

Այն, որ Զախարյանի ասուլիսը վարչապետ Տիգրան Սարգսյանի` կառավարության առաջին նիստի ժամանակ արված հանձնարարականի շրջանակներում է, եւ, բնականաբար, Զախարյանի նախաձեռնությունը չէ, բոլորիս համար պարզ էր: Տարօրինակն այն էր, որ տարիներ շարունակ լրագրողների հետ չշփվող եւ ասուլիսներից շատ հեռու Զախարյանն անձամբ էր որոշել խոսել:

Լրագրողների սպասումները չարդարացան. այսօր առավոտյան պարզվեց, որ Զախարյանը մեկ գիշերվա մեջ հիվանդացել է, եւ նրա փոխարեն ասուլիս կտա նրա տեղակալը` Աշոտ Մուսայանը: Թե ինչո՞ւ էին նախօրոք հայտարարում, որ Զախարյանն է խոսելու, գուցե շատերը կարծեն, որ լրագրողական փոքրիկ հնարք էր` ասուլիսին կարեւորություն տալու եւ որքան հնարավոր է շատ լրագրող բերելու լավագույն տարբերակ, բայց կա նաեւ երկրորդ` ավելի հավանական բացատրությունը: Իսկ գուցե Զախարյանը չէր ցանկանում պատասխանել Քոչարյանի վերաբերյալ հարցերին, որոնք, բնականաբար, հնչելու էին: Քոչարյանի հասցեին քննադատությամբ հանդես գալ Զախարյանն իրեն թույլ չէր տա, ի տարբերություն շատերի (Զախարյանը Քոչարյանի օրոք 4 տարի Երեւանի քաղաքապետ է եղել): Բայց, մյուս կողմից էլ, սիրուն չէր լինի նախագահի հանձնարարականը չկատարելը ու կառավարության ղեկավարին` Տիգրան Սարգսյանին, չպաշտպանելը: