Ես եմ որոշում, թե ով ինչքան պետք է խոսի. Հովիկ Աբրահամյանը` Յուրի Վարդանյանին

Այսօր ՀՀ վարչապետ Հովիկ Աբրահամյանը սպորտի և երիտասարդության հարցերի նախարարության աշխատակիցներին ներկայացրեց նորանշանակ նախարար Գաբրիել Ղազարյանին: Նախ խոսեց արդեն նախկին նախարար Յուրի Վարդանյանը` շնորհակալություն հայտնելով նախարարության աշխատակիցներին համատեղ աշխատանքի համար: «Բայց ստացվեց այն, ինչ ստացվեց»,- իր խոսքը այսպես եզրափակեց Յուրի Վարդանյանը:

Նորանշանակ նախարար Գաբրիել Ղազարյանը նույնպես խոսք ուներ ասելու, որը մի քիչ երկար թվաց Յուրի Վարդանյանին: Նա կատակով նշեց. «Պարո'ն վարչապետ, նոր նախարարի համար էսքան խոսելը երկար չէ՞»: Հովիկ Աբրահամյանին Յուրի Վարդանյանի կատակը հավանորեն  դուր չեկավ, ու նա հակադարձեց. «Ես եմ որոշում, թե ով ինչքան պետք է խոսի, շարունակեք, պարո'ն Ղազարյան»:

Հովիկ Աբրահամյանն իր խոսքում նաև շեշտեց, որ սպորտի և երիտասարդության նախարարությունը պետք է հեռու լինի քաղաքականությունից: