Եթե Մազմանյանը մի բան մտածում էր, անպայման իրագործում էր

Այն, ինչ մտածել էր Մազմանյանը, ինչ ծրագրեր ուներ, կյանքի կկոչվեն, քանի որ դրանք ի նպաստ մեր բուհի են. Yerkir.am-ի հետ զրույցում նշեց Կինոյի, հեռուստատեսության եւ անիմացիայի ֆակուլտետի դեկան Անիտա Երզնկյանը:

Երզնկյանը Մազմանյանի հետ առնչվել է վերջին 2-3 տարիներին, բայց հասցրել է նրա հետ իրականացնել մի շարք ծրագրեր` կապված ինստիտուտի հետ, ցավոք, մի շարք ծրագրեր էլ մնացին կիսատ:

«Մազմանյանը շատ ակտիվ էր, եթե մի բան մտածում էր, անպայման իրագործում էր: Դա շատ բացառիկ ունակություն է եւ բացառիկ տեսակ: Երբեմն ֆանտաստիկ բաներ էր մտածում, ու մենք ասում էինք` ինչպե՞ս կարելի է, այստեղ, այս պայմաններում հնարավոր չէ դա իրագործել, բայց արդյունքում ծրագիրը կյանքի էր կոչվում»,- ասաց Երզնկյանը:

Նա տեղեկացրեց նաեւ, որ Մազմանյանը ցանկանում էր, որ ուսումնառությունը կինոֆակուլտետում բոլոր մասնագիտությունների համար երկու տարի լինի նույնացված, այսինքն` ուսանողների մասնագիտացումը լինի երկու տարի հետո, քանի որ շատ անգամ դիմորդների ցանկությունները չեն համապատասխանում նրանց ունակություններին:

Մազմանյանը ցանկանում էր նաեւ, որ ինստիտուտում պարբերաբար վարպետաց դասեր կազմակերպվեն, ինչպես 2013-ին Լոձի համալսարանի դասախոսները շուրջ երկու ամիս աշխատեցին թատերականի ուսանողների հետ: «Մազմանյանն անգամ կոնկրետ մարդկանց ցուցակ ուներ, որոնց ցանկանում էր հրավիրել ինստիտուտ` դասախոսությունների: Մենք պետք է անենք ամեն ինչ` նրա ծրագրերը շարունակելու, իսկ մտահղացումները` իրականացնելու համար»,- ասաց Երզնկյանը: