Գրիգորիչը չի խորացել, բայց կարծում է` գազի գինը կիջնի

ԱԺ-ում լրագրողների հետ զրույցում ԱԺ ՀՀԿ խմբակցության ղեկավար Գալուստ Սահակյանն անդրադարձավ «ՀայՌուսգազարդի» 20 տոկոսը «Գազպրոմին» վաճառելու փաստին:

«Չի կարելի ասել, որ Հայաստանն ինչ ունի-չունի վաճառում է Ռուսաստանին, քանի որ Հայաստանը գազ չունի»,- ասաց նա` հավելելով, որ թեև թեմայի մեջ չի խորացել, բայց կարծում է, որ գազի գինը կիջնի, և քաղաքացիները գազը կսպառեն այն գնով, ինչ գնով սպառում են Ռուսաստանի քաղաքացիները:

Հարցին, թե ինչո՞ւ «ՀայՌուսգազարդի» 20 տոկոս բաժնեմասը վաճառելու որոշումը չի քննարկվել հասարակության հետ, Գ․Սահակյանը պատասխանեց, որ այդ հարցը շատ է շահարկվում, բայց իրականում հանրությունը ստեղծում է քաղաքական թիմ, որն իր պատասխանատվության և լիազորությունների շրջանակներում պիտի կարողանա գործողություններ կատարել։

«Այնպես չի, որ ամեն ինչը պիտի գանք, Ազատության հրապարակում հարցնենք ու գնանք։ Հանրություն ասածը մեծ հասկացություն է, և եթե որևէ խնդրի լուծման ժամանակ բողոքներ չլինեն, դա վարկաբեկիչ կլինի մեր ազգի համար։ Այնպես չի, որ մեր ընտանիքներում մեծով-փոքրով պիտի համաձայն լինենք»,- ասաց պատգամավորը:

Խոսելով տրանսպորտի ուղեվարձի մասին` նա նշեց, որ տրանսպորտի սակագնի փոփոխությունը միայն գազի գնով պայմանավորված չէ, ուստի դժվարացավ ասել գազի սակագնի չբարձրացումը կազդի՞, արդյոք, ուղեվարձի գնի վրա, թե՞ ոչ։