Դրամահավաքը` դպրոցներում. լրագրողները չափազանցնո՞ւմ են

Դպրոցներում դրամահավաքության հարցն ավելի շատ դուք` լրագրողներդ եք խնդիր սարքում, քան դրանք կան իրականում. այսօր լրագրողներին ասաց ՀՀ ԿԳ նախարար Արմեն Աշոտյանը:

Ըստ նրա` նախարարության կողմից իրականացված սոցիալական հետազոտությունների արդյունքները ցույց են տալիս, որ մարդիկ ԿԳ ոլորտում թիվ մեկ խնդիր են համարում կրթության ոլորտի բարեփոխումները /օրինակ` 12-ամյա կրթության անցումը/, իսկ դրամահավաքությունը երրորդ տեղում է:

«Ես չեմ եղել որեւէ երկրում, որտեղ դպրոցներում առկա չէ դրամահավաքության երեւույթը, ուղղակի մյուս տեղերում միգուցե ավելի քաղաքակիրթ, բաց ու թափանցիկ կերպով է դա արվում: Դրամահավաքությունը կարելի է համարել ապօրինի, եթե դա հրահանգված է կամ տնօրենին հաճոյանալու միջոց, իսկ կամայական բնույթ կրող դրամահավաքներն ապօրինի չեն»,- ասաց նախարարը:

Ըստ նրա` վերջին երկու տարիների ընթացքում դպրոցներում զգալիորեն պակասել են դրամահավաքության դեպքերը: Աշոտյանը հավաստիացնում է` դպրոցներում դրամահավաքությունը կանխելու նպատակով երբեմն ծայրահեղությունների են դիմում. «Օրինակ` այժմ արգելվում է նաեւ թատրոն գնալու համար գումար հավաքել, ինչի պատճառով էլ մանկական ներկայացումները կիսադատարկ դահլիճներում են անցկացվում»: