STOP կառավարությանը. անակնկալ նվեր` վարչապետին

Ուսանողի օրվան` նոյեմբերի 17-ին ընդառաջ`  ՀՅԴ «Նիկոլ Աղբալյան» ուսանողական միությունն այսօր երթ էր կազմակերպել դեպի կառավարություն` բողոքելով ուսման բարձր վարձերի, ցածր կրթաթոշակի, արտագաղթի, կոռուպցիայի, մոնոպոլիայի, անարդյունավետ կառավարման եւ այլնի դեմ:

Այս երթով «Նիկոլ Աղբալյան» ուսանողական միությունը stop էր ասում ՀՀ կառավարությանը, որի վարած քաղաքականության հետևանքով երկիրը հայտնվել է ծանր կացության առջև: Միության 50-ից ավելի ուսանողներ ՀՊՃՀ կենտրոնական մասնաշենքի դիմացից երթով շարժվեցին Երևանի մի շարք բուհերի մոտով` ուսանողներին հորդորելով միանալ իրենց: Հատկանշական է, որ գրեթե բոլոր բուհերի դիմաց կազմ-պատրաստ կանգնած էին ուսխորհրդի նախագահները եւ փակում էին բուհի դռները` երևի մտահոգվելով, որ ուսանողները կմիանան ակցիայի մասնակիցներին:

Նշենք, որ ՆԱՈՒՄ-ի ուսանողները գավաթ էին բերել` հանձնելու կառավարությանը` որպես «պարգեւ» վատագույն կառավարման համար: Գավաթը ստանալու համար ակցիայի մասնակիցներին ժպիտով մոտեցավ կառավարության ներկայացուցիչ Ալեքսանդր Ղազարյանը, սակայն, երբ տեղեկացավ, թե ինչի համար է նախատեսված գավաթը, հրաժարվեց վերցնել` խորհուրդ տալով այն թողնել ընդունարանում: Ուսանողներն, ի նշան բողոքի, բացականչեցին` «հեռացեք»,  ապա կոչ արեցին գավաթն անպայման փոխանցել անձամբ վարչապետ Տիգրան Սարգսյանին:

Մանրամասները` yerkir.am-ի տեսանյութում: