ԱՄՆ-ը կթարմացնի Բելգիայում գտնվող միջուկային զինանոցը

Բելգիան գաղտնի պայմանագիր է կնքել ԱՄՆ-ի հետ իր տարածքում պահվող ամերիկյան միջուկային զինանոցի թարմացման մասին. ըստ Интерфакс-ի` այսօր գրել են բելգիական թերթերը: Քլեյնե-Բրոգելի ռազմակայանում գտնվող  B61-ի հին տարբերակները կփոխարինվեն նորագույն միջուկային ռումբերով:

Բելգիական թերթերը, վկայակոչելով միջուկային սպառազինությունների բնագավառի փորձագետ Հանս Քրիստենսենին, գրում են, որ ՆԱՏՕ-ի անդամ եվրոպական պետությունները, այդ թվում` Բելգիան, 2010-ին Վաշինգտոնի հետ պայմանագիր են կնքել B61-ի արդիականացված տարբերակների տեղակայման մասին: Այսպիսով, ենթադրում են բելգիական ԶԼՄ-ները, Բելգիայում միջուկային զենքը կմնա դեռեւս տասնյակ տարիներ:

Բեգիայի պաշտպանության նախարարությունը հրաժարվել է մեկնաբանել տեղեկությունը: Ի դեպ, այդ երկրում ամերիկյան զինանոցի առկայությունը բելգիացի պացիֆիստների բողոքի ակցիաների մշտական օբյեկտն է: