Բանտերը միայն իրական հանցագործների տեղն են

Հայաստանը, ստանձնելով Եվրոպայի խորհրդի նախագահությունը, շարունակում է իրականացնել եվրոպական չափանիշներին համապատասխան ծրագրեր:

Նմանօրինակ մի ծրագրի սկիզբն էլ տրվեց այսօր.  «Էրեբունի Պլազայում» տեղի ունեցավ  «Ազատազրկման հետ կապված պատիժների կիրառման  նվազեցումը' եվրոպական ստանդարտներին համաձայն» ծրագրի շնորհանդեսը:

Ծրագրի նպատակն է հայաստանյան բանտային համակարգը համապատասխանեցնել եվրոպական բանտային  կանոններին և Եվրոպայի խորհրդի  այլ հանձնարարականներին, մասնավորապես` ԵԽ պրոբացիոն կանոններին, խոշտանգումների կանխարգելման հանձնաժողովի չափորոշիչներին, ՄԻԵԴ-ի  նախադեպերին:

Ծրագրի բյուջեն, որը կազմում  է 300 հազար եվրո, տրամադրել է  Նորվեգիայի կառավարությունը:  Այն տևելու է մեկ տարի և նախատեսվում է ավարտին հասցենել 2014թ. մայիսի 1-ին:

Եվրոպայի խորհրդի  երևանյան գրասենյակի ղեկավար Օլեքսանդր Պավլուկի խոսքով` այս ծրագրով իրենք նպատակ ունեն  աջակցել Հայաստանին Մարդու իրավունքների զարգացման գործում: Պավլուկն ակնկալում է սերտ համագործակցություն շահագրգիռ մարմինների, այդ թվում` քրեակատարողական հիմնարկների և դատախազության հետ:

Եվրոպայի խորհրդի Քրեական իրավունքի հարցերով համագործակցության բաժինը ներկայացնող  Տանյա Ռակուշիչ-Հաջիչը, ներկայացնելով ծրագրի նախապատմությունը, նշեց, որ Հայաստանում այլընտրանքային պատիժ սահմանող  օրենքներ կան, բայց դրանք քիչ են կիրառվում: «Հասարակությունը պետք է գիտակցի, որ բանտերը միայն իրական հանցագործների տեղն են, իսկ թեթև հանցանքներ կատարածների կամ անչափահասների նկատմամբ պետք է կիրառվեն այլընտրանքային պատիժներ»,- ասաց նա  և հավելեց,  որ մեր երկրում գործող այլընտրանքային պատիժները` տուգանքը, պատժից վաղաժամկետ պայմանական ազատազրկումը և այլն, պետք է վերանայվեն:

Քննարկմանը ներկա  էր նաև ՀՀ Վճռաբեկ քրեական պալատի նախագահ Դավիթ Ավետիսյանը: Նրա խոսքով`  քաղաքացիական հասարակություն ունեցող երկրի համար կարևոր է քրեակատարողական հիմնարկների համապատասխանությունը միջազգային ստանդարտներին, իսկ Հայաստանն այլընտրանքային պատժամիջոցներ կիրառելու գործում դեռ անելիքներ ունի: Անդրադառնալով բանտերի գերբեռնվածության խնդրին` Ավետիսյանն առաջարկեց իրագործել  մասնավոր բանտերի գաղափարը:

Իսկ ծրագրի  ղեկավար Հայկ Խեմչյանի խոսքով`  պետք է նոր միջոցներ մշակվեն քրեակատարողական հիմնարկները բեռնաթափելու համար:

Նշենք, որ այս ծրագիրը  ՀՀ իրավական և դատական բարեփոխումների 2012-2016թթ. ռազմավարական ծրագրերի մի մասն է, որի վերաբերյալ փաստաթուղթը ստորագրվել է անցյալ տարի Հայաստանի ԱԳՆ-ի և Եվրոպայի խորհրդի միջև: