Տարոն Մարգարյանի ընտրատեղամասում անհետացել է լրագրողի անձնագրի կնիքը

Ավանի թիվ 1/17 ընտրատեղամասում, ուր րոպեներ անց պետք է իր քաղաքացիական պարտքը կատարի Երեւանի գործող քաղաքապետ Տարոն Մարգարյանը, անհետացել է նույն ընտրատեղամասում իր քաղաքացիական պարտքը կատարող լրագրողի անձնագրի կնիքը:

Yerkir.am-ի հետ զրույցում լրագրող Արեգնազ Մանուկյանը հայտնեց, որ, երբ կատարեց ընտրությունը, մի քանի րոպե անց ձեռքի թեթեւ հպումով փորձել է մաքրել կնիքը, որն անհետացել է: Այս մասին նա տեղեկացրել է հանձնաժողովի նախագահին, վերջիններս կապ են հաստատել ԿԸՀ ներկայացուցչի հետ, որտեղից էլ հորդորել են թանաքանյութին սովորական թանաք ավելացնել:

Ուշագրավ է, որ լրագրողին խնդրել են թույլ տալ երկրորդ անգամ կնքել անձնագիրը, բայց այդ դեպքում էլ դրոշմը կրկին անհետացել է: