Ինչպե՞ս կարող է Չեխիան օգնել Հայաստանի` հարևանների հետ բարդ հարաբերություններին

Ապրիլի 11-ին տեղի ունեցավ ԱԳ նախարարի պաշտոնակատար Էդվարդ Նալբանդյանի և պաշտոնական այցելությամբ Հայաստան ժամանած Չեխիայի Հանրապետության առաջին փոխվարչապետ, ԱԳ նախարար Կարել Շվարցենբերգի հանդիպումը, որին հաջորդեց մամլո ասուլիսը:

Պատասխանելով չեխական MF DNES թերթի հարցին, թե ինչպե՞ս կարող է Չեխիան օգնել Հայաստանին իր հարևանների հետ բարդ հարաբերություններում, ՀՀ ԱԳ նախարարի պաշտոնակատարն ասել է.

«Եթե Դուք նկատի ունեք Հայաստանի և Ադրբեջանի միջև կամ նկատի ունեք Լեռնային Ղարաբաղի հիմնախնդրի լուծումը, ապա Չեխիան, լինելով Եվրամիության անդամ, ինչպես և Եվրամիությունը ու Եվրամիության մյուս անդամները, աջակցում է Լեռնային Ղարաբաղի հիմնախնդրի կարգավորման գործընթացում Մինսկի խմբի համանախագահների ջանքերին և դրա մասին բազմիցս հայտարարություններ են արվել թե' Չեխիայի կողմից, թե' Եվրոպական Միության կողմից: 

Ես պետք է հիշեցնեմ, որ Պրահայում հանդիպումներ են տեղի ունեցել՝ նաև ամենաբարձր մակարդակով, որոնք ուղղված էին հիմնախնդրի խաղաղ կարգավորմանը: Երբ Պրահայում կայացավ Արևելյան գործընկերության գագաթնաժողովը, հանդիպում կայացավ նաև Հայաստանի և Ադրբեջանի նախագահների և եռանախագահերի միջև, որն ուղղված էր հենց Լեռնային Ղարաբաղի հիմնախնդրի կարգավորմանը: Մենք միշտ բարձր ենք գնահատում Չեխիայի հավասարակշիռ մոտեցումը առ այն, որ Լեռնային Ղարաբաղի հիմնախնդիրը պիտի լուծվի միայն խաղաղ ճանապարհով, բանակցությունների միջոցով»: