Հայաստանն ու Չեխիան կհամագործակցեն համաձայնագրի հենքով

Հայաստան-Չեխիա համագործակցությունը երեկ ամրագրվեց համագործակցության միջկառավարական համաձայնագրի ստորագրմամբ: Այն ներառում է մշակույթի, կրթության, գիտության, երիտասարդության եւ սպորտի ոլորտները:

Համագործակցության առաջնահերթությունները տրվելու են գրահրատարակչական, թարգմանական ծրագրերին, երաժշտարվեստի ոլորտը, մասնավորապես` դասական եւ հոգեւոր երաժշտության ոլորտները զարգացնելուն, համատեղ թատերական ծրագրերին:

ՀՀ մշակույթի նախարար Հասմիկ Պողոսյանն ու Հայաստանում Չեխիայի դեսպան Իվան Եստրաբը համաձայնագրի ստորագրումից հետո, փաստելով արդեն առկա համագործակցությունը երկու երկրների միջեւ, ընդգծել են փաստաթղթի կարեւորությունը այսուհետ համագործակցությունն ավելի արագ զարգացնելու հարցում:

Որպես գործնական քայլ ներկայացվել է Չեխիայի մշակույթի նախարարության կողմից եւ ՅՈՒՆԵՍԿՕ-ի նախաձեռնությամբ կազմակերպվող  «Քվադրինալ» միջազգային փառատոնին 2011 թվականին հայկական կողմի մասնակցությունը: