''Բաքվի անեքսիան'' սկսվում է

Իրանական PressTV-ն տեղեկացնում է կովկասյան 17 քաղաքների շարժման հիմնման մասին, որի կազմում նաեւ Ադրբեջանի մայրաքաղաք Բաքուն է: Շարժման նպատակը Իրանին «միանալն է». գրում է mignews.com-ը:

Իրանի խորհրդարանի ազգային անվտանգության եւ արտաքին քաղաքականության հանձնաժողովի անդամ Մանսուր Հաքիկապտուրը հայտարարել է. «Սկսվել է Իրանի 17 քաղաքների անեքսիայի շարժումը, դրանցից մի քանիսն ադրբեջանական են: Մենք հույս ունենք, որ այդ նպատակին հասնել կլինի ժողովուրդների համագործակցության եւ միջազգային կազմակերպությունների համակողմանի աջակցության շնորհիվ»:

Իրանցի պատգամավորը խստորեն դատապարտել է Ադրբեջանի իշխանություններին, որոնք իրենց տարածքում թույլատրել են անցկացնել հակաիրականական` Հարավային Ադրբեջանի ազատագրման շարժման համաժողովը: Նա հայտարարել է, որ Արդեբիլի, Թավրիզի եւ Օրումիեի «թյուրքական երիտասարդությունը» պատրաստվում է «պատասխան տալ ադրբեջանցի պաշտոնյաների դավադրական միջոցառումներին» եւ հռչակել է, որ վերադարձնելու է այն քաղաքները, որոնք Իրանից անջատվել էին Քաջարների թագավորության ժամանակ:

Պատգամավորը նաեւ հայտարարել է, որ կովկասյան 17 քաղաքների խնդրին անդրադարձող համաժողով կհրավիրվի մոտ ժամանակներս: