Եղածները քիչ էին` մի հատ էլ նոր նախարարությո՞ւն

Տնտեսության զարգացման համար կարեւոր նախապայման է միջավայրը, որտեղ պետք է այն ձեւավորվի, եւ այս առումով` հետընտրական գործընթացները հաշվի չառնելը մեծ սխալ կլինի. լրագրողների հետ հանդիպման ժամանակ կարծիք հայտնեց տնտեսագետ Թաթուլ Մանասերյանը :

Նրա կարծիքով` տնտեսության զարգացման համար անհրաժեշտ է ոչ միայն կայունություն, այլ նաեւ կադրային փոփոխություններ կառավարության կազմում, ինչպես նաեւ`  համակարգային փոփոխություններ:

Մանասերյանը վարչապետի փոփոխության լուրջ կարիք չի տեսնում, փոխարենը առաջարկում է նախարարական պորտֆելների ճիշտ բաշխում կատարել. «Պետք է հմուտ թիմ ձեւավորել` բանիմաց մասնագետներով եւ կայացած մարդկանցով, ովքեր, որեւէ ոլորտի նկատմամբ պատասխանատվություն վերցնելով, չեն տապալի այն»:

Մանասերյանն առաջարկում է ստեղծել արտաքին առեւտրի եւ արդյունաբերության նախարարություն եւ կարծում է` սխալ է, երբ տնտեսական գործառույթը իրականացնում է քաղաքական գերատեսչությունը, տվյալ դեպքում` արտաքին գործերի նախարարությունը:

Ըստ Մանասերյանի`անհարժեշտ է նաեւ բնապահպանության նախարարությունը միացնել գյուղատնտեսության նախարարությանը. նրա խոսքերով` այս երկու ոլորտը սերտորեն կապված են եւ շատ դեպքերում իրար հակասող գործունեություն են ծավալում:

Անդրադառնալով Րաֆֆի Հովհաննիսյանի առաջարկած բարեփոխումների փաթեթին`  բանախոսը նշեց, որ Հովհաննիսյանի պահանջների մեջ դրական ալիք է տեսնում. «Րաֆֆին հակակշիռ է այսօրվա իշխանությանը եւ այն մշակույթը, որ բերում է, դրական կարող է լինել: Նման պահանջները պիտի օգնեն իշխանությանը` ավելի սթափ վերաբերվել իրավիճակին»: