Դամասկոսը դեմ է ԱՊԼ-ի միջնորդությանը

Դամասկոսը դեմ է, որ Արաբական պետությունների լիգան «իր ներկայիս տեսքով» միջնորդ լինի սիրիական ճգնաժaմի կարգավորման գործընթացում. տեղեկացնում է РИА Новости-ն:

«Հաշվի առնելով այն բացասական եւ կողմնակալ քաղաքականությունը, որ վարում է ԱՊԼ-ն, Սիրիան կտրականապես դեմ է դրա մասնակցությանը սիրիական ճգնաժամի խաղաղ կարգավորմանն ուղղված  միջազգային ցանկացած ջանքի կամ ցանկացած ծրագրի»,- ասվում է Սիրիայի ԱԳՆ-ի տարածած հայտարարության մեջ:

Սիրիայի անդամակցությունը Արաբական պետությունների լիգային սառեցվել է 2011 թվականի նոյեմբերին: Անցյալ շաբաթ արաբական պետությունների ԱԳ նախարարների հանդիպման ժամանակ որոշվել է ԱՊԼ-ում տեղ հատկացնել սիրիական ընդդիմության ազգային կոալիցիային, «երբ այն կձեւավորի գործադիր իշխանության մարմիններ»: Այդ որոշմանը դեմ են արտահայտվել Իրաքը, Լիբանանը եւ Ալժիրը:

Դամասկոսի կարծիքով` ԱՊԼ-ն դարձել է «նավթով եւ գազով հարուստ Սաուդյան Արաբիայի եւ Կատարի քաղաքականության պատանդը»: Սիրիան պնդում է, որ այդ երկրները ֆինանսավորում են իր տարածքում գործող գրոհայիններին, նաեւ ձգտում են հասնել օտարերկրյա ռազմական միջամտության: