Դատարանը մերժեց Րաֆֆի Հովհաննիսյանի հայցն ընդդեմ ԿԸՀ-ի

Դիմելով դատարան` Ր.Հովհաննիսյանը վիճարկում էր ՀՀ ԿԸՀ անգործությունը և պահանջում ԿԸՀ-ին պարտավորեցնել ՀՀ նախագահի թեկնածու Սերժ Սարգսյանի ավելի քան 1600 քարոզչական շտաբների ու դրանց վրա տեղադրված քարոզչական պաստառների շուկայական արժեքը և դրանց ծախսերը ներառել ՀՀ նախագահի թեկնածու Սերժ Սարգսյանի քարոզչական ծախսերի մեջ և անվավեր ճանաչել ՀՀ ԿԸՀ թիվ 60-Ա որոշումը:

Քննելով ներկայացված հայցադիմումը այսօր ՀՀ վարչական դատարանը որոշել է.

«Րաֆֆի Կ. Ռիչարդի Հովհաննիսյանի հայցն ընդդեմ ՀՀ կենտրոնական ընտրական հանձնաժողովի` ՀՀ կենտրոնական ընտրական հանձնաժողովի անգործությունը ոչ իրավաչափ ճանաչելու, ՀՀ Նախագահի թեկնածու Սերժ Սարգսյանի ավելի քան 1600 քարոզչական շտաբների և դրանց վրա տեղադրված քարոզչական պաստառների շուկայական արժեքը ուսումնասիրելուն և այդ ծախսերը ՀՀ Նախագահի թեկնածու Սերժ Սարգսյանի քարոզչական ծախսերի մեջ ներառելուն, ՀՀ Նախագահի թեկնածու Սերժ Սարգսյանի քարոզչական ծախսերը ՀՀ ընտրական օրենսգրքի 88-րդ և 26-րդ հոդվածի 5-րդ մասով սահմանված չափերը ավելի քան 10 տոկոսով գերազանցելու դեպքում` ընտրություններն անվավեր ճանաչելուն կամ ՀՀ Նախագահի թեկնածու Սերժ Սարգսյանի գրանցումն ուժը կորցրած ճանաչելու համար դատարան դիմելուն ՀՀ կենտրոնական ընտրական հանձնաժողովին պարտավորեցնելու, 2013 թվականի փետրվարի 25-ի թիվ 60-Ա որոշումն անվավեր ճանաչելու պահանջի մասին, մերժել ամբողջությամբ։
Դատական ծախսերի հարցը համարել լուծված։
Սույն որոշումն ուժի մեջ է մտնում հրապարակման պահից, վերջնական է և ենթակա չէ վերանայման»։