ԲՀԿ-ականներն ապահով բարգավաճում են. ''168 ժամ''

Թեև «Բարգավաճ Հայաստան» կուսակցությունը չի մասնակցում նախագահական ընտրություններին, բայց որպես խորհրդարանում ներկայացված ուժ` ընտրական հանձնաժողովներում ունի ներկայացուցիչներ. գրում է «168 Ժամ» թերթը:

Կուսակցությունից հայտարարել էին, հիշեցնում է թերթը, որ փետրվարի 18-ին կայանալիք նախագահական ընտրությունների ընթացքը «Բարգավաճ Հայաստանը» վերահսկելու է ընտրական հանձնաժողովներում իր անդամների միջոցով, որոնց թիվն, ըստ ԲՀԿ ներկայացուցիչների` հասնում է շուրջ 700-ի:

«168 ժամի» աղբյուրների փոխանցմամբ, սակայն, չնայած թեկնածու չառաջադրելու և որևէ այլ թեկնածուի չսատարելու մասին կուսակցության հայտարարությանը, ԲՀԿ-ական գործարար պատգամավորներն ընտրողների` իրենց կոլեկտիվների անդամների, բարեկամների ցուցակներ են պատրաստում և ներկայացնում գործող նախագահ, նախագահի թեկնածու Սերժ Սարգսյանի գրասենյակներ:

Ըստ թերթի նույն աղբյուրի` այդպիսով նրանք իշխանություններին հասկացնում են` անկախ այն բանից, թե ԲՀԿ նախագահ Գագիկ Ծառուկյանն ինչ է անում, «մենք մեր փայ անելիքն անում ենք, մեզ մի կպեք»: