Ինչի՞ նախագահի աթոռը տենց էժանացավ. գործարար

Գործարար, նախկին ՕԵԿ-ական Արայիկ Հայրապետյանը` Լավանդայի Արայիկը, գործարարների իր կուսակցությունը ստեղծելու է նախագահական ընտրություններից հետո: Այս մասին նա հայտնեց Yerkir.am-ի հետ զրույցում, բայց մինչ այդ անդրադարձավ առաջիկա նախագահական ընտրություններին:

Հայրապետյանը, ի տարբերություն շատերի, չասաց, որ ընտրություններում միանշանակ հաղթելու է Սերժ Սարգսյանը: «Կանխորոշել չի կարելի, բայց քանի որ ես միշտ հայտարարում եմ, որ ես միշտ իշխանամետ եմ, նշանակում է պետք է պաշտպանեմ իշխանության մեջ գտնվող մարդուն»,- հայտարարեց գործարարը:

Նկատի ունենալով նախագահի թեկնածուներին կամ նրանց, ովքեր նախագահ դառնալու ցանկություն էին հայտնել, գործարարը հայտարարեց, որ ապշած եւ զարմացած է: «Ինչի՞ նախագահի պաշտոնը, աթոռը տենց էժանացավ, որ մարդիկ, ովքեր իրենց հասցեն չեն կարող հավաքել, ուզում են նախագահ դառնալ: Ես զարմանում եմ այդ մարդկանց տգիտության աստիճանի վրա, որ փորձում են իբր նախագահ դառնալ: Ինձ թվում ա` մոդա ա, որ փորձելու են հետո իրենց թոռներին ցույց տալ, որ տեսեք-տեսեք նախագահ է ուզել ձեր պապը դառնալ»,- նշեց գործարարը եւ ընդգծեց, որ անգամ թոռները նրանց վրա կծիծաղեն:

Հայրապետյանը զարմացած է, թե ինչու այդքան «անկապ թեկնածու» ուզում էր եւ ուզում է նախագահ դառնալ: