Կարեւորն օրակարգն է

Շաբաթ օրը տեղի ունեցած ՀՀՇ համագումարին հրավիրվածներից ներկա չէին ԲՀԿ ներկայացուցիչները. գրում է «Ժողովուրդը»:

Ինչպես պնդում են թերթի լավատեղյակ աղբյուրները, նախապես որոշված է եղել, որ համագումարին պետք է գար ԱԺ մարդու իրավունքների պաշտպանության մշտական հանձնաժողովի նախագահ Էլինար Վարդանյանը:

Սակայն ԲՀԿ-ում որոշում են կայացրել քանի որ իրենք չեն մասնակցում նախագահի ընտրություններին, չեն սատարում որևէ մեկին, ուստի ճիշտ կլինի ներկայացուցիչ չուղարկեն ոչ մի կուսակցության նախընտրական համագումարին:

ԱԺ պատգամավոր, ԲՀԿ խոսնակ Տիգրան Ուրիխանյանն էլ «Ժողովուրդ»-ի հետ զրույցում ասել է, թե իրենք կարևորում են քաղաքական ուժերի օրակարգը, նրանց նախաձեռնությունները, այլ ոչ թե նրանց միջոցառումներին պարզապես գնալ մասնակցելը: