"Արմմոնո"-ն 10 տարեկան է

Փետրվարի 29-ից մարտի 5-ը կանցկացվի «Արմմոնո» մոնոներկայացումների թատերական միջազգային փառատոն:

2012թ. «Արմմոնո»-ն նշելու է իր 10-ամյակը, եւ փառատոնի տնօրեն Մարիաննա Մխիթարյանը yerkir.am-ին տեղեկացրեց, որ հոբելյանական փառատոնի շրջանակներում արդեն ընտրված են հետաքրքիր դերասանական աշխատանքներ` ինչպես արտերկրից, այնպես էլ Հայաստանից:

«Փառատոնն իրենց ներկայությամբ կպատվեն մոնոփառատոների ղեկավար-տնօրեններ: Դերասաններից մի քանիսը փառատոնի շրջանակներում նաեւ վարպետության դասընթացներ կանցկացնեն Երեւանի կինոյի եւ թատրոնի ինստիտուտի ուսանողների համար»,- ասաց Մխիթարյանը` հավելելով, որ փառատոնը միմիայն դրական լիցքեր կպարգեւի թատերասեր հանրությանը. «Սպասվում են նաեւ անակնկալներ»:

«Արմմոնո» միջազգային փառատոնն առաջին անգամ անցեկացվել է 2003թ. սեպտեմբերի 24-ին: Փառատոնի հիմնադիրն է Հայաստանի թատերական գործիչների միության նախագահ Հակոբ Ղազանչյանը:

Փառատոնին մասնակցության հայտերը ընդունվում են մինչեւ 2011թ. դեկտեմբերի 20-ը: