Ընենց եք ասում, ոնց որ մանդատը վաճառում են

«Երկիր»-ի զրուցակիցն է ԱԺ հանրապետական պատգամավոր, «Մաքս-գրուպ» ընկերության սեփականատեր Խաչիկ ՄԱՆՈՒԿՅԱՆԸ:

- Պարոն Մանուկյան, երկու օր առաջ նախագահ Սերժ Սարգսյանը հայտարարեց, որ գործարարությունը պետք է հետեւողականորեն տարանջատվի պետական համակարգից: Մտավախություն չունե՞ք, որ ապագա խորհրդարան անցնելու ձեր շանսերը նվազում են:

- Բայց ես ի՞նչ կապ ունեմ էդ հայտարարության հետ:

- Այսինքն` եթե գործարարությունը պետք է տարանջատվի պետական համակարգից, կարելի է ենթադրել, որ պատգամավորները եւս չպետք է զբաղվեն գործարարությամբ, իսկ դուք պատգամավոր եք եւ, որքան մեզ հայտնի է, նաեւ` գործարար:

- Բայց դուք ի՞նչ գիտեք` ես գործարարությամբ զբաղվում ե՞մ, թե՞ ոչ:

- Գիտենք, որ ձեզ են պատկանում մի շարք հայտնի ընկերություններ:

- Չէ, ես էդ ամբողջը հանձնել եմ կառավարման: Ես հիմա գործարարությամբ չեմ զբաղվում, վաղուց արդեն միմիայն քաղաքական դաշտում եմ: Ասենք, փայատեր եմ մի քանի բաների, բայց ամբողջը տրված է կառավարման, իրանք էլ կառավարում են: Հիմա ես օրենքների դաշտում եմ:

- Այդ աշխատանքները հսկելը ձեզնից ժամանակ չի՞ խլում:

- Իհարկե, ոչ: Հաշվետվություններն ուղարկում են մեր mail-ի վրա, նայում ենք, խնդիր չկա:

- Այսինքն` դուք ձեր ամբողջ ժամանակը նվիրում եք օրենսդիր աշխատանքի՞ն:

- Այո:

- Կարո՞ղ եք մի քանի օրենսդրական նախագիծ նշել, որի համահեղինակը դուք եք:

- Ես ունեմ նաեւ օրենք, որը հիմա շրջանառության մեջ ենք դրել` «Կոոպերացիայի մասին» օրենքը, շատ լուրջ եւ կարեւոր օրենք ա, արդեն մի քանի ամիս քննարկվում ա կառավարության հետ: Հիմա պայմանավորվածություն ենք ձեռք բերում, որպեսզի կառավարության հետ միասին ներկայացնենք այդ օրենքը, որի վրա ահագին երկար ժամանակ աշխատել ենք:

- Նորից բիզնես միջավայրի՞ն է առնչվում:

- Ես ավելի շատ հասկանում եմ էդ դաշտից, էդ դաշտը ինձ հոգեհարազատ ա, եւ ուզում եմ, որ էդ դաշտում մենք կարողանանք հստակ օգտագործել բոլոր օրենքները, որպեսզի մեր գյուղատնտեսական տեխնիկան, հողերը... վոբշեմ, գյուղացին հնարավորություն ունենա ճիշտ օգտագործել իր հողերը եւ բերք ու բարիք ստանա, այսինքն` տարին փակի եկամուտով: Ես գերխնդիր եմ դրել իմ առաջ, որ դա հասցնեմ ավարտին:

- Իսկ ի՞նչ կասեք ձեր կոլեգաների մասին: Նրա՞նք էլ նախագահի հայտարարությունից անհանգստանալու պատճառներ չունեն:

- Ես գտնում եմ, որ էդ նույն գործարարները, որոնք հիմա լուրջ խավ են ներկայացնում, փորձություն անցած, տնտեսական դաշտում շատ լուրջ, ասենք, գիտելիքներ ձեռք բերած մարդիկ են, որոնցից հրաժարվելը, ինձ թվում ա, շատ ծանր հետեւանքներ կարող ա ունենա:

- Այսինքն, ձեր կարծիքով, ԱԺ-ին պե՞տք են գործարար պատգամավորներ:

- Բա էդ մարդիկ էս երկրի ստեղծողներն են եւ, ասենք, առաջ տանողները: Բոլորը խոշոր բիզնեսին են նայում, խոշոր բիզնեսմեններին են նայում եւ այլն, այլն: Բա էդ մարդիկ, որոնք առաջադեմ, նու, չասեմ խավը, բայց առաջադեմ... իրենք են փայլում, իրենք են ռիսկի գնում, իրենք են, ասենք, մտածում, իրենք են անալիզներ անում:

- Կարո՞ղ եք ձեզ ծանոթ գործարար պատգամավորներից նշել մի քանիսին, ովքեր օրենսդրական գործունեությամբ են զբաղվում:

- Դե ես չգիտեմ` ովքեր են գործարարներ:

- Չե՞ք ճանաչում գործարար պատգամավորներին:

- Դե, գործարար պատգամավոր ասածը ո՞րն ա: Ինձ էլ են ասում գործարար, բայց ես ձեզ բացատրեցի, չէ՞: Հիմա ես ո՞նց մեկի անունը տամ, եթե նա ասում է, որ ինքն էլ է օրենքի դաշտում աշխատում: Ես հիմա չեմ կարող ասեմ, առաջ կարող էի ասել:

- Ո՞ւմ կարող էիք նշել առաջ:

- Դե, էդ օրենքի պահով ես էլ էի գործարար պատգամավոր, համ գործարար պատգամավոր էի, համ էդ համարումն ունեի: Այսինքն, էն ժամանակ դա համապատասխանում էր իրականությանը: Էն ժամանակ շատ մարդիկ կային:

- Ստացվում է` քանի որ հիմա շատերն իրենց բիզնեսները տվել են կառավարման, դադարո՞ւմ են գործարար լինելուց:

- Իհարկե, եթե մարդը գործարարությամբ չի զբաղվում, ինչպե՞ս կարելի է նրան համարել գործարար:

- Մասնակցելո՞ւ եք առաջիկա խորհրդարանական ընտրություններին:

- Դեռ վաղ է էդ մասին խոսել:

- Բայց ցանկություն ունե՞ք կրկին մանդատ ստանալու:

- Դե, մանդատ ստանալը... ախր, ընենց եք ասում, ոնց որ մանդատը վաճառում են, ես էլ պիտի գնամ առնեմ կամ ստանամ: Մանդատը պիտի ձեռք բերել, պիտի ժողովուրդը քվե տա, որպեսզի դու մանդատի տեր դառնաս, հո իմ ուզելո՞վ չի:

- Բայց հույսեր փայփայո՞ւմ եք:

- Նու, դա մենակ իմ ասելով չի: Ունենք կուսակցություն, կուսակցության որոշում ունենք եւ այլն, եւ այլն: Այսինքն` մի քանի խնդիրներից ա կախված, բայց եթե ստացվի էնպես, որ մասնակցեմ ընտրություններին, ինձ թվում աՙ լավ կըլնի: Դեռ շատ գործ կա անելու:

Զրուցեց Շուշան ՇԱՀՎԵՐԴՅԱՆԸ