ՀՅԴ պատգամավորը իշխանություններից պարզաբանում է պահանջում

Կարեւորագույն պաշտոններից մարդիկ հրաժարվում են ու տեղափոխվում մեկ այլ պաշտոնի եւ բացարձակապես բացատրություն չի տրվում, այնինչ սա պարտադիր պահանջ է. այսօր խորհրդարանում լրագրողներին ասաց ՀՅԴ խմբակցության պատգամավոր Արմեն Ռուստամյանը` նշելով, որ դա հարիր չէ որեւէ  քաղաքակիրթ երկրի:

Նա հայտարարեց, որ  իշխանությունը պետք է հստակ պարզաբանումներ ներկայացնի, թե ինչու հրաժարական տվեցին քաղաքապետն ու ոստիկանապետը: Իսկ պատճառաբանությունները, թե հրաժարական են տվել ավելի լավ գործի անցնելու կապակցությամբ, Արմեն Ռուստամյանին չեն բավարարում:

«Քաղաքապետը լավ գործը չէ՞, ոստիկանապետը լավ գործը չէ՞»,- հարցրեց Արմեն Ռուստամյանը:

Դաշնակցական պատգամավորին միայն ԱԺ նախագահ Հովիկ Աբրահամյանի հրաժարականի պատճառն է իրական թվացել, քանի որ վերջինս անկեղծորեն խոստովանել է, որ իր հրաժարականը ընտրական գործընթացներով է պայմանավորված: Ըստ Ա.Ռուստամյանի` պարզ է որ հետնաբեմում լուրջ գործընթացներ կան, որոնց մասին պարզապես անհարմար է խոսել: