Նախագահի հրաժարականը պահանջում է հասարակության չնչին տոկոսը

Ձախողվածը իշխանություններն են, ձախողում կա, բայց միայն իշխանության մեջ. լրագրողների հետ հանդիպման ժամանակ հայտնեց ՀԱԿ անդամ Զոյա Թադեւոսյանը եւ վստահեցրեց, որ իրենց աշխատանքները «չափազանց բարձր մակարդակով են կազմակերպվում»:

«Ձախողում» եւ «հաջողում» բառերին վերապահումով է մոտենում հանրապետական Լեռնիկ Ալեքսանյանը: Ըստ նրա` ՀԱԿ-ի ձախողումը ցույց տվեց վերջին հանրահավաքի արդյունքը: Ալեքսանյանն անտրամաբանական է համարում ՀԱԿ-ի կողմից Սերժ Սարգսյանի հրաժարականի պահանջը եւ նշում, որ նախագահը չի կարող հրաժարական տալ հասարակության «չնչին տոկոսի» պահանջի դեպքում:

Անդրադառնալով Սերժ Սարգսյանի հրաժարականի պահանջի անհրաժեշտությանը, ՀԱԿ անդամն էլ նշեց, որ «եթե Սերժ Սարգսյանը որոշել է այս երկիրը վերջնականապես կործանել, ուրեմն մեղքի լուրջ բաժին կվերցնի իր վրա, եւ այդ դեպքում թող հասարակությունը մտածի, թե ինչպիսի քայլերի գնա»: Թադեւոսյանը ասաց, որ խնդիրն այն չէ, թե ով է ավելի ուժեղ, այլ այն, որ «մենք բոլորս ենք կործանում մեր երկիրը»: