Ցլամարտի վերջը

Ավելի քան 20 հազար հանդիսատես է հավաքվել երեկ Բարսելանայի «Մոնումենտալ» արենայում` դիտելու  Իսպանիայի հյուսիս-արեւմուտքի վերջին  ցլամարտը: Միջոցառման տոմսերը սեւ շուկայում վաճառվել են 1500 եվրոյով:

Անցյալ տարվա հուլիսին Կատալոնիայի ինքնավար մարզի խորհրդարանը ցլամարտն արգելող որոշում է կայացրել կենդանիների պաշտպանների ճնշման տակ. դարերի պատմություն ունեցող այդ միջոցառմանը վերջ տալու մասին խնդրագրի տակ ստորագրել է մոտ 180 հազար մարդ. տեղեկացնում է ИТАР-ТАСС-ը:

Իսկ արգելքին դեմ հանդես եկողները շարունակում են ապացուցել, որ սպանդանոցում կենդանու մահն ավելի դաժան է, քանի մարդու հետ հավասար պայքարում: Բացի այդ` վերջերս հաշվել են, որ  ցլամարտի վերացումը կատալոնացի հարկատուների վրա 400 մլն եվրո կնստի` ցլամարտիկների հետ պայմանագրերի խզում, արենաների պարապուրդ եւ այլն: Սակայն կատալոնական խորհրդարանի պատգամավորներից մեկի խոսքերով` պետք չէ տնտեսել վատ սովորություններն արմատախիլ անելու վրա:

2012 թվականի հունվարի 1-ից Կատալանիայում ցլամարտ չի լինի: Իսկ բանավեճը, թե այդ հին ավանդույթն ընդունելի՞ է էթիկայի եւ բարոյականության տեսանկյունից, դեռ կշարունակվի Իսպանիայում, որտեղ ցլամարտն ազգային նվաճում է համարվում: