Դատելու են Բեռլուսկոնիին մարմնավաճառներ մատակարարողներին

Իտալիայի դատախազությունը մեղադրանք է առաջադրել ութ հոգու դեմ, որոնք մարմնավաճառներ են մատակարարել վարչապետ Սիլվիո Բեռլուսկոնիին. հաղորդում է BBC-ն: Դատախազներն այս որոշումն ընդունել են այն բանից հետո, երբ հարցաքննել են վարչապետի` Իտալիայի հարավում գտնվող Բարի քաղաքում բնակվող մի քանի ընկերներին ու ծանոթներին:

Բարիի դատախազությունը երեք տարի շարունակ հետաքննել է էլիտար մարմնավաճառության գործը, որը վերահսկում է տեղացի գործարար Ջանպաոլո Տարանտինին:

Մեղադրյալները, հետաքննության տվյալներով, զբաղվել են Բեռլուսկոնիի համար երիտասարդ աղջիկների հավաքագրմամբ` աղջիկներին խոստանալով աշխատանք եւ այլ գայթակղիչ բաներ: Տարանտինին աղջիկներին Բեռլուսկոնիի տուն է տարել` ինչ-որ խնջույքների: Մյուս մեղադրյալը գերմանացի դերասանուհի Սաբինա Բեգանն է` Թագուհի Բի կեղծանվամբ:

Նշվում է, որ  Բեռլուսկոնիի դեմ դեռեւս մեղադրանք չի առաջադրվել:

Սեպտեմբերի սկզբին Տարանտինին եւ նրա կինը ձերբակալվել էին` Բեռլուսկոնիին սադրելու համար: Նրանք կես միլիոն եվրո էին պահանջում վարչապետից` խոստանալով, որ գումարը ստանալու դեպքում հետաքննող մարմիններին կասեն, որ Բեռլուսկոնին տեղյակ չի եղել կատարվածից:

Վարչապետը հայտարարել է, որ այդ գումարն ինքը փոխանցել է Տարանտինիին, սակայն դա ոչ թե մատուցված ծառայությունների վճարն է եղել, այլ պարզապես` ֆինանսական օգնություն նրա ընտանիքին` ծանր վիճակից դուրս գալու համար: