Ազնիվ մետաղներն այլմոլորակայիններ են

Տարածում գտած տեսության համաձայն` ոսկի եւ պլատին Երկիր մոլորակում չեն կարող լինել, գուցե միայն` երկրագնդի միջուկում: Հետազոտողները վերջերս հայտնաբերել են այդ ենթադրությունը հաստատող ապացույցներ, ըստ որոնց` ազնիվ մետաղները մեր մոլորակում հայտնվել են տիեզերքից. գրում է Nature գիտական ամսագիրը:

Երբ Երկիրը մոտ 4,5 մլրդ տարի առաջ դեռեւս տաք էր, մեծ մասամբ` հեղուկ, այն բաժանվել է երկու մասի` մետաղական միջուկ եւ քարե կեղեւ: Բոլոր հաշվարկների եւ փորձերի համաձայն` զարգացման այդ փուլում ոսկու եւ մյուս ազնիվ մետաղների պաշարները պետք է ընկղմվեին Երկրի միջուկի մեջ: Այդ դեպքում ինչո՞ւ են այսօր այդ մետաղները հայտնաբերվում երկրակեղեւում:

Գիտնականները դա բացատրում են այսպես. 3,8 մլրդ տարի առաջ հսկայական երկնաքարերը, «հարձակվելով» մեր մոլորակի վրա իրենց հետ բերել են ազնիվ մետաղներ: «Ազնիվ մետաղների մեծ մասը, որոնց վրա է հիմնվում մեր տնտեսությունը եւ բազմաթիվ կարեւոր արդյունաբերական գործընթացներ, երկրագնդում հայտնվել են երջանիկ դիպվածի արդյունքում, երբ Երկիրն ընկել է 20 տրիլիոն տոննա աստերոիդային նյութի հարվածի տակ»,- ասում է հետազոտության հեղինակ` Բրիստոլի համալսարանի գիտնական Մաթիաս Ուիլբոլդը: