Վիժում` ծննդաբերության փոխարեն

Փողոցային առեւտրի վերացումը, կրպակների հանումը եւ միջքաղաքային տրանսպորտի` ավտոկայաններ տեղափոխումն այսօր Երեւանում յուրօրինակ հեղափոխություն են ստեղծել. կարծում է գրականագետ Վարդան Դեւրիկյանը` նշելով, որ այդ փոփոխություններից հետո Երեւանն ամենեւին էլ չբարեկարգվեց:

Գրականագետի խոսքով` այս ամենը դանդաղ գործող ռումբի է նման, որի արդյունքում մարդիկ ջարդուխուրդ կլինեն:

«Ինչո՞ւ պետք է մարդիկ կիսաընդհատակյա առեւտուր անեն. հիմա մարդիկ կանգնում են շքամուտքերում եւ նույն իրենց առեւտուրն անում: Այս ամենից ավելի մեծ ձեւախեղում է առաջանում: Այն, ինչ արվում է, ջարդելու համակարգ է կոչվում»,- պարզաբանեց նա:

Դեւրիկյանը կարծիքով` այսօրվա իրականության մեջ մենք ոչ թե պետք է եղածը կրճատենք, այլ փորձենք նորը ստեղծել:

«Ո՞վ ասաց, որ կրպակ չպիտի լինի: Պիտի լինի: Գռեհկություն չպիտի լինի: Յուրաքանչյուր մասնավոր դեպքում կարելի է գտնել լուծումներ: Ես կարծում եմ, որ փոփոխություններն անխուսափելի են, մենք ուղղակի ուշ ենք սկսել»,- գրականագետին հակադարձեց ճարտարապետ Լեւոն Իգիթյանը:

Ի պատասխան սրա` Դեւրիկյանն ասաց, որ մենք շուտ ենք սկսել, ինչի արդյունքում քաղաքը պարզապես կարող է ոչ թե ծննդաբերել, այլ վիժել: