Արտակարգ միջոցառումներ` Եվրոպայի տնտեսությունը փրկելու համար

Ֆրանսիան եւ Գերմանիան առաջարկում են ստեղծել եվրագոտու կառավարություն եւ դրա ղեկավար նշանակել Եվրամիության նախագահ Հերման վան Ռոմպեյին: Նոր կառավարությունը կազմվելու է 2,5 տարի ժամկետով: Այդ առաջարկությամբ նամակն այսօր ուղարկվելու է Ռոմպեյին. տեղեկացնում է ИТАР-ТАСС-ը:

Նախատեսվում է տարին երկու անգամ Ռոմպեյի գլխավորությամբ եվրագոտու պետությունների եւ կառավարությունների ղեկավարների գագաթաժողովներ անցկացնել, որոնց որոշումները պարտադիր են լինելու բոլոր մասնակիցների համար:

Բացի այդ` երեկ Փարիզում անցկացված խորհրդակցության արդյունքում Նիկոլա Սարկոզին եւ Անգելա Մերկելը հայտարարել են, որ մտադիր են 2013 թվականից ընդհանուր հարկ նշանակել ֆրանսիական եւ գերմանական ձեռնարկությունների վրա: Ֆրանսիան եւ Գերմանիան սեպտեմբերին առաջարկելու են  Եվրամիությանը նաեւ ընդահնուր հարկ սահմանել ֆինանսական գործողությունների վրա:

«Եվրամիությոնը պետք է ավելի մեծ հնարավորություններ ունենա` միջամտելու պարտատեր երկրի տնտեսական քաղաքականությանը»,- հայտարարել է Անգելա Մերկելը` հավելելով, որ դա հավակնոտ ծրագիր է, սակայն միայն հավակնությունները հնարավորություն կտան հասնելու ցանկալի արդյունքների: