Հայաստանում զոհվել է ՌԴ բանակի զինծառայող

Օգոստոսի 10-ին զորավարժությունների ժամանակ Հայաստանում զոհվել է Սարատովի մարզից զորակոչված ժամկետային զինծառայող Գալեմժան Աուբեկերովը: Այդ ողբերգության մասին Взгляд-инфо-ին այսօր տեղեկացրել է զոհվածի մայրը, որը որդու մահվան մասին տեղեկացել է odnoklassniki.ru սոցիալական կայքից: Մեկ օր անց ստացվել է պաշտոնական հեռագիրը, որ Գալեմժանը զոհվել է զորավարժությունների ժամանակ:

Աուբեկերովը ծառայել է Հյուսիսային Կովկասում: Նրանց զորամասը Հայաստան է ուղարկվել` մասնակցելու զորավարժությունների: «Խրամատի վրայով թռչելիս նա ընկել է ու կոտրել պարանոցը: Ընկել է ոչ միայն նա, երկուսին հանել են խրամատից, նրան չեն հասցրել»,- լրատվամիջոցին պատմել է զոհվածի եղբայրը`հավելելով, որ ինքը զրուցել է ականատեսների հետ. Գալեմժանն ինքն է ընկել, ոչ կանոնադրային հարաբերությունների մասին խոսք լինել չի կարող: