ՀԲ-ն Հայաստանին 200 մլն դոլարի վարկ կտրամադրի

Համաշխարհային բանկը պատրաստվում է առաջիկա 2 տարիների ընթացքում Հայաստանին տրամադրել 200 մլն դոլարի վարկ:

ՀԲ երեւանյան գրասենյակի տնօրեն Ժան Միշել Հափիի խոսքով` Համաշխարհային բանկի խումբը բարձր է գնահատել Հայաստանի հետ համագործակցությունը. ՀԲ աջակցության շնորհիվ Երեւանում ջրամատակարարումը 2008 թ. 17.4 ժամից դարձել է 21.5 ժամ, մանրէաբանական անվտանգությունը բազային 93 տոկոսից դարձել է 98 տոկոս, ՀԲ-ն նաեւ լուրջ ներդրումներ է իրականացրել ճանապարհաշինության, ոռոգման համակարգերի, առողջապահական ենթակառուցվածքների ոլորտներում:

Նշենք, որ Միջազգային զարգացման ընկերակցության 77 երկրների շարքում Հայաստանը կատարողականի աստիճանով երկրորդն է` շնորհիվ բարեփոխումների եւ ծրագրային փաթեթների որակի: Ըստ Հափիի` դա Հայաստանին հնարավորություն է տալիս արտոնյալ վարկեր ստանալ: