Բաքվից վտարել են Bloomberg-ի հայ ֆոտոթղթակցուհուն

Բաքվի օդանավակայանում մեկ օր պահելուց հետո երկրից արտաքսել են Bloomberg գործակալության ֆոտոթղթակցուհի Դիանա Մարկոսյանին:

Ըստ ադրբեջանական լրատվամիջոցների` Bloomberg գործակալությունը, Դիանայի` Ադրբեջան մուտքի հետ կապված, նախապես կապ էր հաստատել Ադրբեջանի արտգործնախարարության հետ, որը, պահանջելով բոլոր փաստաթղթերը, հավաստիացրել էր, թե ֆոտոթղթակցուհու ժամանման հետ կապված խնդիրներ չեն լինի:

Սակայն Բաքվի օդանավակայանում Դիանան հանդիպել է լուրջ խոչընդոտների: Օդանավակայանի աշխատակիցները, տեսնելով նրա հակական  ազգանունը,  հրաժարվել են տրամադրել մուտքի արտոնագիր և մոտակա թռիչքով նրան ուղարկել են Ստամբուլ:

Turan  գործակալության հետ զրույցում Դիանան ընդգծել է, որ դեպքը միաժամանակ ծիծաղ ու զայրույթ է առաջացնում, քանի որ ադրբեջանական կողմին բոլոր փաստաթղթերը նախապես տրամադրվել էին, սակայն «օդանավակայանում Ադրբեջանի արտաքին գործերի նախարարության ներկայացուցիչը հավաստիացրեց, որ այլևս անկարող է որևէ բան անել»:

Նա հավելել է, որ, չնայած հայկական ծագմանը, երբեք Հայաստանում չի եղել եւ ԱՄՆ-ի ու Ռուսաստանի քաղաքացի է:

Աղբյուր՝ emedia.am