Կազանում առաջընթաց կլինի՞

Եթե Մոսկվայում ձեռք բերված դրական միտումները շարունակվեն` Կազանում կողմերին կհաջողվի առաջընթաց արձանագրել: Այդ մասին այսօր` Շվեդիայի արտգործնախարար Կարլ բիլդտի հետ համատեղ ասուլիսում հայտարարեց ՀՀ արտգործնախարար Էդվարդ Նալբանդյանը` հիշեցնելով կատամարտող կողմերի արտգործնախարարների մոսկովյան հանդիպումից հետո արված հայտարարությունը:

Անդրադառնալով ադրբեջանական կողմի ռազմատենչ հռետորությանը` նախարարը հիշեցրեց դովիլյան հայտարարությանը, որով կոչ էր արվում հակամարտող կողմերի հասարակություններին պատրաստել խաղաղության:

«Դովիլի հայտարարություններից հետո շարունակում են ռազմատենչ հայտարարություններ հնչել: Ադրբեջանցի պաշտոնյաները խոսում են խնդրի կարգավորման վերջին շանսի մասին, իսկ ի՞նչն է խանգարում նրանց օգտագործել այդ շանսը»,- ասաց Նալբանդյանը:

Շվեդիայի արտգործնախարար Կարլ Բիլդտը, իր հերթին, նշեց, որ իրենց համար էլ Ղարաբաղյան խաղաղ կարգավորումն այլընտրանք չունի եւ հուսով է, որ կողմերին կհաջողվի համաձայնության գալ եւ հասնել փոխզիջման: