Սարյանի կտավը վաճառվեց 320 հազար ֆունտ ստերլինգով

Հունիսի 8-ին Լոնդոնում անցկացված «Ռուսական արվեստի աճուրդի» ժամանակ վաճառքի էր հանվել նաեւ Մարտիրոս Սարյանի «Կովկասյան քաղաքի փողոց» կտավը:

Աճուրդին ներկա լինելու համար Լոնդոն էր մեկնել նաեւ Մարտիրոս Սարյանի տուն-թանգարանի տնօրեն Ռուզան Սարյանը:

Նա «Երկիր»-ի հետ զրույցում նշեց, որ կտավը վաճառվել է 320 հազար ֆունտ ստերլինգով: Այն գնել է Ռուսաստանից մի մեծահարուստ, որը ցանկացել է անհայտ մնալ. գնորդն աճուրդին մասնակցել է հեռախոսով:

«Թե նկարի ճակատագիրն ինչ կլինի` հայտնի չէ, հնարավոր է, որ տասնյակ տարիներ այն չտեսնենք: Ես ուզեցի ուղղակի գոնե մի ակնթարթ այդ նկարի հետ անցկացնել, դրա համար էլ գնացի: Ճիշտն ասած` ոչ մի հույս էլ չունեի»,- ասաց Ռ. Սարյանը:

Նա նաեւ ցավով նշեց, որ մենք չենք կարող փոխել մեր դրսի հարուստ հայերի մտածելակերպը, որոնք չեն ցանկանում գումարներ ներդնել մշակույթի մեջ: «Նրանց համար դեռ հասու չէ, որ դա կապիտալի ամենաձեռնտու ներդրումն է, որը բարձրացնում է նաեւ իրենց նկարիչների վարկը, քանի որ աճուրդը շատ կարեւոր է նկարչի վարկանիշի համար միջազգային ասպարեզում` այն միայն նկարի առեւտուր չէ»,- ասաց տիկին Սարյանը:

Նշենք, որ Ռ. Սարյանը մոտ մեկ ամիս առաջ էր իմացել, որ Սարյանի կտավը շուտով աճուրդի է հանվելու: Այդ կապակցությամբ նա հանդես է եկել հայտարարությամբ, որ մեծահարուստ հայերից մեկը գնի կտավը եւ այն նվիրաբերի թանգարանին, կամ գոնե պահի իր համար, իրավիճակի մասին տեղյակ էր պահել նաեւ մշակույթի նախարարությանը: