320 հազար դրամ յուրացնելու համար ոստիկանության աշխատակցին մեղադրանք է առաջադրվել

Վարորդների վճարած տուգանքների գումարները յուրացրած եւ կեղծիքներ կատարած ոստիկանության աշխատակցին մեղադրանք է առաջադրվել:

Ինչպես հայտնում են Հատուկ քննչական ծառայությունից, Ոստիկանության ներքին անվտանգության վարչությունից ստացված ծառայողական քննության նյութերի հիման վրա ՀՀ ճանապարհային ոստիկանության պետական հատուկ ծառայություն իրականացնող պաշտոնատար անձի կողմից առերեւույթ պաշտոնեական կեղծիք եւ պաշտոնեական դիրքն օգտագործելով յուրացում կատարելու դեպքերի առթիվ հարուցված եւ քննվող քրեական գործի նախաքննության ընթացքում ձեռք բերված փաստական տվյալների արդյունքում բացահայտվել են կատարված հանցագործության հանգամանքները, բավարար ապացույցների հիման վրա որպես մեղադրյալ ներգրավվել է ճանապարհային ոստիկանության աշխատակից Գ. Հովհաննիսյանը:

Քրեական գործով կատարված մի շարք քննչական եւ դատավարական գործողությունների արդյունքում հիմնավորվել է, որ ՀՀ ճանապարհային ոստիկանության տեսուչները տարբեր քաղաքացիների նկատմամբ ոչ սթափ վիճակում ավտոմեքենա վարելու համար 100 հազ. ՀՀ դրամ տուգանք նախատեսող վարչական իրավախախտումների վերաբերյալ արձանագրություններ են կազմել եւ հիշյալ փաստաթղթերը փոխանցել են ՀՀ ճանապարհային ոստիկանության աշխատակից, ոստիկանության մայոր Գ. Հովհաննիսյանին, ով իր իրավասության սահմաններում, հիշյալ արձանագրությունների հետ կապված վարչական գործընթացը սահմանված կարգով իրականացնելու փոխարեն, այդ քաղաքացիներից առձեռն վերցրել է 100.000-ական ՀՀ դրամ գումարները, այնուհետեւ քաղաքացիների անունից վարչական իրավախախտման արձանագրություններում նշված տուգանքների մուծման ժամկետները 6 ամսով երկարացնելու համար կեղծ դիմումներ է գրել, որից հետո արձանագրություններին կցել է վճարման կեղծ կտրոններ՝ ցույց տալով, թե, իբր, հիշյալ քաղաքացիներն իրականում վճարումներ են կատարել բանկի համապատասխան մասնաճյուղում, սակայն, պաշտոնեական դիրքն օգտագործելով, յուրացրել է ընդհանուրը 320 հազ. ՀՀ դրամ գումար:

Այս կերպ՝ Գ. Հովհաննիսյանը պաշտոնեական դիրքն օգտագործելով կատարել է մի քանի դրվագներով իրեն վստահված ուրիշի գույքի զգալի չափերով յուրացումներ եւ պաշտոնեական կեղծիքներ: Վերջինիս մեղադրանք է առաջադրվել ՀՀ քրեական օրենսգրքի 179-րդ հոդվածի 2-րդ մասի 1-ին կետով եւ 314-րդ հոդվածի 1-ին մասով:

Քրեական գործի նախաքննությունը շարունակվում է: