Ադրբեջանը կապիտուլյացիայի լեզվով է խոսում

Հասկանալու համար, թե արդյո՞ք Դովիլյան հայտարարությունը բեկումնային է լինելու հայ-ադրբեջանական բանակցային գործընթացում, պետք է հասկանալ Ադրբեջանի իշխող վերնախավի դիրքորոշումները:

Ռազմական հոգեբան Դավիթ Ջամալյանն այսօր լրագրողների հետ հանդիպման ժամանակ ասաց, որ ադրբեջանական կողմը երկու անգամ պաշտոնապես արձագանքել է այս հռչակագրին եւ արտաքուստ հավանություն է տալիս դրան, սակայն այդ փաստաթղթի տակ դիտարկում է իր համար ցանկալի մի տեքստ եւ շարունակում է կրկնել քարոզչական իր թեզերը:

Օրինակ` մայիսի 27-ին` իրենց անկախության օրը նախագահ Ալիեւը հայտարարեց, թե չի ճանաչելու Արցախի անկախությունը: Ըստ Դ. Ջամալյանի` այս ամենը վկայում է այն մասին, որ Ադրբեջանը մեզ հետ խոսում է կապիտուլյացիայի լեզվով եւ փորձում է խնդրի «կարգավորման» իր սցենարը պարտադրել:

Սակայն ադրբեջանական դիրքորոշումը պատմականորեն անտրամաբանական է. պատմության մեջ չկան նախադեպեր, երբ ազգը ինքնորոշվում է եւ իր բնակության տարածքում ստեղծում անկախ պետականություն, այլեւս ինքնակամ չի վերահպատակվում, վերագաղութացվում:

«Անգամ ծիծաղելի է ենթադրել, որ մեր երկրի ռազմաքաղաքական ղեկավարությունը կդիմի նման արկածախնդրության, «կարգավորման» քայլի: Եվ հանուն ինչի՞ պիտի անի: Մանավանդ, որ այստեղ ամենածիծաղելին այն է, որ կապիտուլյացիայի տրամաբանությամբ մեզ հետ խոսում է պարտված կողմը»,- ասաց Դ. Ջամալյանը: