Եկեղեցին անզո՞ր է

Մայիսի 15-ի միջադեպը, երբ Երեւանի Մալաթիա-Սեբաստիա համայնքի Սուրբ Երրորդություն եկեղեցու հոգեւոր հովիվ Տեր Եսայի քահանայի եւ «Եհովայի վկաներ» կրոնական կազմակերպության ներկայացուցիչների միջեւ բախում էր տեղի ունեցել, պարզվում է` առաջին դեպքը չէ:

Իջեւան քաղաքում Ծաղկազարդի օրը աղանդի հետեւորդների եւ Իջեւանի հոգեւոր հովվության ու քաղաքի Սբ Ներսես Շնորհալի եկեղեցու հոգեւոր հովիվ Տեր Սիմեոն քահանա Առաքելյանի միջեւ բախում է տեղի ունեցել:

«Նրանք Իջեւանում քարոզչություն էին իրականացնում. այդ թվում՝ մեր տուն բերեցին հրավիրատոմս, որի վրա նշված չէր, թե ովքեր են: Նկարի բովանդակությունից հասկացա` խոսքը եհովականների մասին է: Որոշեցի գնալ եւ տեսնել, թե ինչ է: Իրենց հավաքին ներս մտա եւ, քանի որ կային նորեկներ, որոշեցի դարձի բերել նրանց: Հայտարարեցի, որ դա աղանդ ա...»,- «Երկիր»-ին հայտնեց Տեր Սիմեոնը:

Քահանայի հետ վեճի են բռնվում, ապա  4 եհովականներ` իրենց առաջնորդ Սիրակի գլխավորությամբ, բռնություն են կիրառում, հետո էլ դիմում են դատարան` թե քահանան ներխուժել է իրենց տարածք եւ խանգարել աշխատանքը: Գործն այժմ փակված է` անհիմն բողոք լինելու պատճառով:

Իջեւանում, ըստ հոգեւոր հովվի, բացի Եհովայի վկաներից, կան նաեւ հիսունականներ եւ ադվենտիստներ: Վերջիններս քողարկված քարոզչություն են իրականացնում` սեմինարի տեսքով:

Թե ի՞նչ քայլեր է ձեռնարկում եկեղեցին՝ հոգեւոր հովիվը պատասխանեց. «Մենք ուրիշ ի՞նչ կարող ենք անել, բացի նախազգուշացնելուց, քարոզելուց, բացատրելուց: Միջամտելու իրավունք չունենք, ոչ էլ կարիքը կա: Պարզապես եկեղեցին իր քարոզչությամբ խոսքով կարող է թուլացնել եւ կասեցնել»:

Այն, որ աղանդավորներն իրենց հավաքներին արդեն հրավիրում են հոգեւորականներին, սա, հաստատ, եկեղեցու աշխատանքների մասին լավ բան չի ասում: