Խնդրին արագ լուծում տրվեց

Հայաստանի նախագահ Սերժ Սարգսյանի հանձնարարությամբ` Երևանի քաղաքապետարանը երկու նոր բնակարան է հատկացրել Արցախյան պատերազմի մասնակից, ազատամարտիկ, 2-րդ խմբի զինվորական հաշմանդամ Գագիկ Հովհաննիսյանի բազմազավակ ընտանիքին:

2011թ. մարտի 31-ին բնակարանային պայմանների բարելավման խնդրանքով Գագիկ Հովհաննիսյանը դիմել էր Հայաստանի պաշտպանության նախարարին: Խնդրին արագ լուծում տրվեց, և մայիսի 9-ին` Հաղթանակի օրը, 11 երեխաների հայրը Երևանի քաղաքապետ Կարեն Կարապետյանից ստացավ Քանաքեռ-Զեյթուն վարչական շրջանում գտնվող նոր ու հարմարավետ երկու բնակարանի բանալիները. տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը:

Շնորհավորելով Հաղթանակի և Շուշիի ազատագրման օրվա առթիվ` Երևանի քաղաքապետը Հովհաննիսյանների ընտանիքին մաղթեց առողջություն, ընտանեկան ջերմ միջավայր:

Ազատամարտիկ Գագիկ Հովհաննիսյանը դեռ մարտի դաշտում էր ուխտել 12 արու զավակ ունենալ` ի հիշատակ ռազմի դաշտում զոհված իր 12 մարտական ընկերների: Տղաներն առայժմ 7-ն են, բայց, ինչպես Գագիկն է ասում, ամեն ինչ դեռ առջևում է:

Բնակարանի բանալիներից բացի, քաղաքապետ Կարեն Կարապետյանը նոր բնակարանը կահավորելու համար ազատամարտիկի ընտանիքին նվիրեց կենցաղային տեխնիկա, իսկ երեխաներին` տարբեր նվերներ: