Նուբարաշենի խնդիրները շատ են

6000 բնակչություն ունեցող Նուբարաշեն վարչական շրջանում կուտակված խնդիրները շատ են` ցածր է աղբահանության վճարների հավաքագրման ցուցանիշը, վերանորոգման կարիք ունեն բազմաբնակարան շենքերի տանիքներն ու շքամուտքերը, բարեկարգման անհրաժեշտություն կա բակային տարածքներում:

Այսօր Նուբարաշեն աշխատանքային շրջայց կատարելով եւ հիմնախնդիրներին ծանոթանալով` Երեւանի քաղաքապետ Կարեն Կարապետյանը հանձնարարել է գտնել դրանց լուծման հնարավոր տարբերակներ: Նա նշել է, որ Երևանը պետք է գրավիչ և հարմարավետ լինի յուրաքանչյուր բնակչի համար, այսինքն` պետք է ապահովվեն կենցաղային տարրական պայմաններ, եւ մայրաքաղաքի ծայրամասերը չպիտի դուրս մնան զարգացման ծրագրերից. տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը: