Սպասենք քաղաքապետարանի արձագանքին

Ապրիլի 1-ի տվյալներով` Երեւանի 161 նախադպրոցական հաստատություններ է հաճախում 25.048 երեխա, որոնցից 2168-ը` մարզերում հաշվառվածներն են:

Նշենք, որ մարզերից Երեւան հաճախող երեխաների համար անհրաժեշտ է վճարել 8000 դրամ ամսավճար:

«Երեւանի քաղաքապետարանի ենթակայությամբ գործող մանկապարտեզները գործում են անվճար, եթե երեխան ունի Երեւանի հաշվառում, երեխայի ծնողներից մեկն ազատամարտիկ է կամ ԶՈՒ աշխատակից»,- ասաց Երեւանի քաղաքապետարանի աշխատակազմի կրթության վարչության գլխավոր մասնագետ Արմինե Գաբրիելյանը:

Նա նշեց, որ քանի դեռ նախադպրոցական կրթությունը պարտադիր չէ, իրենք չենք կարող ծնողին ստիպել, որպեսզի երեխային մանկապարտեզ տանի:

Գաղտնիք չէ, որ Երեւանում մի շարք դպրոցներ կիսադատարկ են, սակայն, ինչպես նշեց Գաբրիելյանը, քաղաքապետարանը չի նախատեսում դպրոցներում կցակառույցներ առանձնացնել` մանկապարտեզների ծանրաբեռնվածության թեթեւացման նպատակով:

Նա նշեց, որ ապրիլի 1-ից ՆՈՒՀ-երում խիստ վերահսկողություն է հաստատվել սննդի ապահովման, ինչպես նաեւ լրացուցիչ գումարների հավաքագրումից զերծ մնալու համար:

«Մանկապարտեզներում հավաքագրվում է գումար լրացուցիչ կրթական ծառայությունների համար: Այսինքն` եթե մանկապարտեզում լրացուցիչ պարապում են անգլերեն կամ այլ լեզուներ, ծնողը դրա համար է միայն վճարում: Մոնիտորինգ է անցկացվում նաեւ սննդի վերահսկողության հարցում»,- ասաց Ա. Գաբրիելյանը` հավաստիացնելով, որ խախտումներ ապրիլի 1-ից մինչ օրս չեն նկատվել:

Ինչ վերաբերում է մասնավոր մանկապարտեզներին, նա նշեց, որ քաղաքապետարանի որոշումից մասնավոր մանկապարտեզները չեն տուժի, քանի որ իր երեխային մասնավոր մանկապարտեզ տանող ծնողն էլի կշարունակի օգտվել այդ ծառայությունից:

Նշենք նաեւ, որ լրագրողներից ոմանք կոնկրետ մանկապարտեզներ նշեցին, որտեղ օրերս խախտումներ են նկատել. սպասենք քաղաքապետարանի արձագանքին: