Կոչ են անում սառեցնել Ադրբեջանին տրամադրվող ֆինանսական օգնությունը

ՀՅԴ Ամերիկայի Հայ Դատի հանձնախումբը նամակ է հղել ԱՄՆ կոնգրեսականներին` կոչ անելով սառեցնել Ադրբեջանին տրամադրվող ֆինանսական օգնությունը, քանի որ այդ երկիրն իր ռազմատենչ քաղաքականությամբ ապակայունացնում է իրադրությունը տարածաշրջանում: Որպես օրինակ` բերվում են հայկական քաղաքացիական ինքնաթիռները ոչնչացնելու մասին ադրբեջանական սպառնալիքները:

Կից ներկայացվել են Հայ Դատի գրասենյակի ԱՄՆ կառավարության հետ հարաբերությունների բաժնի ղեկավար Քեյթ Նահապետյանի նկատառումներն այդ հարցի առնչությամբ: Փաստաթղթում նշվում է, որ 2012 թվականի արտասահմանյան օգնության ֆինանսական նախագծում հարկ է ներառել հետեւյալ կետերը`

1. ամենաքիչը 60 միլիոն ԱՄՆ դոլարի օգնություն տրամադրել Հայաստանին` տնտեսական զարգացման համար,

2. առնվազն 10 միլիոն դոլար` Արցախի զարգացման համար,

3. շարունակել կիրառել Ազատության գործընթացի 907 կետը եւ պահպանել ռազմական օգնության հավասարությունը Հայաստանի եւ Ադրբեջանի համար:

4. նպաստել ԱՄՆ-ԼՂ անմիջական շփումներին,

5. վերականգնել ԼՂ-ի մասնակցությունը ԵԱՀԿ Մինսկի խմբի միջնորդությամբ անցկացվող բանակցային գործընթացին,

6. առնվազն 10 միլիոն դոլար հատկացնել Հայաստանին` ռազմական հարցերի համար: