Թրամփ-Զելենսկի հեռախոսազրույցից քիչ անց Սպիտակ տունը խնդրել է սառեցնել Կիևին տրվելիք ռազմական օգնությունը

ԱՄՆ նախագահ Դոնալդ Թրամփի և Ուկրաինայի նախագահ Վլադիմիր Զելենսկու հեռախոսազրույցից 91 րոպե անց Սպիտակ տունը Պենտագոնին հրահանգ է տվել դադարեցնել Կիևին ամերիկյան ռազմական օգնություն տրամադրելու գործընթացը. ըստ Yerkir.am-ի՝ հայտնում է BBC-ն:

Ըստ ԶԼՄ-ների տրամադրության տակ հայտնված էլեկտրոնային նամակների՝ Սպիտակ տան պաշտոնյա Մայք Դաֆին պաշտպանության նախարարությանը խնդրել է դադարեցնել օգնության տրամադրումը, քանի որ ԱՄՆ նախագահի վարչակազմը պլանավորում է վերանայել միջոցների տրամադրման որոշումը:

Ավելի վաղ տեղեկացրել էինք, որ հուլիսի 25-ին տեղի ունեցած Թրամփ-Զելենսկի հեռախոսազրույցի պատճառով ԱՄՆ նախագահի դեմ իմպիչմենթի հետաքննություն էր սկսվել: Թրամփը Զելենսկիին խնդրել էր հետաքննել իր քաղաքական մրցակից Ջո Բայդենի և նրա որդու գործունեությունն Ուկրաինայում:

Դեմոկրատների պնդմամբ` Թրամփը ճնշում է գործադրել Զելենսկիի վրա՝ սպառնալով սառեցնել Ուկրաինային տրամադրվող ռազմական օգնությունը:

Հիշեցնենք՝ օրերս ԱՄՆ-ի ներկայացուցիչների պալատը Թրամփին իմպիչմենթ է հայտարարել մեղադրական երկու հոդվածներով՝ իշխանության չարաշահում և հետաքննության խոչընդոտում:

Հիմա իմպիչմենթի հարցը պետք է քննվի Սենատում, որը, ի տարբերություն Ներկայացուցիչների պալատի, վերահսկում են Թրամփի կուսակից հանրապետականները: