80-ամյա տատիկը 9 օր փլատակների տակ է ապրել

Բոլորն արդեն վստահ էին, որ 80-ամյա կինն ու նրա թոռնիկը զոհվել են Ճապոնիայում տեղի ունեցած ավերիչ երկրաշարժից, սակայն ինը օր անց նրանց ողջ եւ առողջ դուրս բերեցին փլատակների միջից:

«Թելեգրաֆը» գրում է, որ ճապոնուհի Սումի Աբեն եւ նրա 16-ամյա թոռ Ջին Աբեն թակարդվել էին Իշինոմակի ծովափնյա քաղաքում գտնվող իրենց երկհարկանի տան խոհանոցում:

Տղան բժիշկներին պատմել է, որ աղետից հետո կարողացել է հասնել սառնարանին եւ տատիկին կերակրել յողուրտով, նրան «Կոկա-Կոլա», ջուր է խմեցրել եւ ամուր գրկել է` տաքացնելու համար: Ի վերջո, կարողացել է բարձրանալ տանիքին եւ օգնություն կանչել:

45 րոպե անց ոստիկանները կարողացել են ներս մտնել նրանց խոհանոցը եւ ուղղաթիռով դուրս բերել փլատակված տանից:

Ոստիկանության մամուլի խոսնակն ասել է. «80-ամյա կնոջ եւ 16-ամյա տղայի ջերմությունը բավականին ցածր էր, բայց նրանք գիտակից վիճակում էին»:

Թեեւ փրկվածներ կան, սակայն զոհվածների թիվն օր օրի աճում է: