Գալուստ Սահակյանը խուսափում է սենսացիայից

ՀՀԿ փոխնախագահ եւ ԱԺ պատգամավոր Գալուստ Սահակյանի համար Րաֆֆի Հովհաննիսյանի հացադուլը  ընդամենը հետաքրքիր է, նա հետեւելու գործողությունների հետագա զարգացմանը:

Այսօր լրագրողների հետ հանդիպման ժամանակ Գ. Սահակյանը նշեց, որ երբ նորանկախ Հայաստանի հիմքերն էին դրվում, հացադուլներ էին լինում, որոնք ունեին հստակ պայմաններ, իսկ այս դեպքում պայմաններն անհասկանալի են եւ վերացական:

«Ինձ համար ցավալի է, որովհետեւ ես նրան այլ դիրքերում եւ պայմաններում եմ պատկերացրել: Րաֆֆի Հովհաննիսյանը, փաստորեն, գոնե ինձ համար չհիմնավորված հացադուլ է հայտարարել»,- ասաց Գալուստ Սահակյանը:

Հարցին, թե չի՞ պատրաստվում` որպես գործընկեր, այցելել Րաֆֆի Հովհաննիսյանին` Ազատության հրապարակ, ՀՀԿ-ական պատգամավորը պատասխանեց. «Շատ ցանկալի կլիներ Րաֆֆի Հովհաննիսյանի հետ զրուցել: Բայց մեր իրականությունում ցանկացած ազնիվ մղում դառնում է քաղաքական շահարկումների առարկա եւ սենսացիա: Իսկ ես ինձ տրամաբանորեն չեմ տանի այնտեղ, որ ազնիվ մղումները չդառնան սենսացիոն քննարկումների առարկա»: