Զարմանում են, որ զարմանում ենք…

Մի քանի օր է հայաստանյան զանգվածային լրատվամիջոցներում բուռն քննարկման նյութ է դարձել Հայ Առաքելական եկեղեցու Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանի Bentley մակնիշի ավտոմեքենայի թեման:

Երեկ «Երկիր»-ի հետ զրույցում Մայր Աթոռի մամլո դիվանի պատասխանատու Տեր Վահրամ քահանա Մելիքյանը ձեռնպահ մնաց որեւէ մեկնաբանություն տալուց: Մայր Աթոռն, արդյո՞ք, պատրաստվում է թեման քննարկել, թե՞ ոչ, Տեր Վահրամը դիվանագիտական պատասխան տվեց` ասելով. «Քննարկման դեպքում Մայր Աթոռն անպայման հայտարարությամբ հանդես կգա»:

Թեմայի վերաբերյալ Արարատյան հայրապետական թեմի մամլո դիվանի պատասխանատու Էլզա Մանուկյանը «Երկիր»-ին հայտնեց, որ Սրբազանը պետական պաշտոնյա չէ, որ իրեն նվիրաբերված գույքը դիտվի որպես կոռուպցիայի դրսեւորում: «Սրբազանն էլ է մարդ, ով ունի մասնավոր սեփականություն եւ գույք: Այսինքն՝ այդ մարդն իրավունք չունի՞ մեքենա ունենալ կամ մեքենա նվեր ստանալ: Ի՞նչ վատ բան կա դրանում»,- զարմացավ մամլո պատասխանատուն եւ հավելեց. «Եթե պետական պաշտոնյային Bentley նվիրեին, դա կնշանակեր, որ կա կոռուպցիա, բայց հոգեւորականը, բնականաբար, պետական պաշտոնյա չէ, եւ նրան մեքենա նվիրելը որեւէ բանի հետ կապված չէ»:

Իսկ թե մինչ այդ Սրբազանն ի՞նչ ծառայողական մեքենայից էր օգտվում, մամլո դիվանի պատասխանատուն նշեց. «Մինչ այդ շատ շքեղ Merseders Benz էր»: