Իրենց բացթողումներն են վերացնում

Փետրվարի 1-ին կառավարությունում քննարկվել է «Ժամանակավոր անաշխատունակության նպաստների մասին» ՀՀ օրենքում նախատեսվող փոփոխությունների վերաբերյալ նախագիծը:

Համաձայն առաջարկվող փոփոխությունների` նախատեսվում է վերացնել վարձու աշխատողի հղիության և ծննդաբերության նպաստը հաշվարկելու համար հիմք վերցվող միջին ամսական աշխատավարձի առավելագույն շեմն ու վերանայել միջին աշխատավարձը հաշվարկելու կարգը. տեղեկացնում է կառավարության տեղեկատվության և հասարակայնության հետ կապերի վարչությունը:

Նախատեսվում է նաև նպաստը վճարել ժամանակավոր անաշխատունակության ժամանակահատվածի տոնական ոչ աշխատանքային օրերի համար` պահպանելով դրա չվճարումն ընդհանուր հանգստյան` շաբաթ և կիրակի օրերի համար: Դրանով վերացվում է նախկինում կատարված բացթողումը:

Վարչապետ Տիգրան Սարգսյանը ՀՀ աշխատանքի և սոցիալական հարցերի նախարար Արթուր Գրիգորյանին հանձնարարել է հասարակական կազմակերպությունների մասնակցությամբ հանրային քննարկում կազմակերպել:

Նախագիծը և հանրային քննարկման հրավերը կտեղադրվեն ՀՀ աշխատանքի և սոցիալական հարցերի նախարարության կայքում (www.mss.am):