Ադրբեջանը շարունակում է խախտել հրադադարը. կան վիրավորներ

Ինչպես հայտնում են ԼՂՀ ՊԲ-ից, հունվարի 14-ին, ժամը` 12.25-ի սահմանում, շփման գծի հարավարեւելյան (Մարտունու) ուղղությամբ հակառակորդի կողմից արձակված գնդակից ձախ անրակի շրջանում հրազենային վիրավորում է ստացել շարքային զինծառայող 1992թ. ծնված Վարդան Անդրանիկի Հարությունյանը:

Ժամը 12.50-ին  նա տեղափոխվել է զինվորական հոսպիտալ: Վիճակը բավարար է:

Դրանից մեկ օր անց` հունվարի 15-ին ժամը 17.20-ի սահմանում նմանատիպ մեկ այլ միջադեպ է արձանագրվել ղարաբաղա-ադրբեջանական զորքերի շփման գծի արեւելյան (Ասկերանի) ուղղությամբ: Հակառակորդի կողմից ձեռնարկված հերթական հրաձգության արդյունքում ձախ բազկի շրջանում հրազենային վիրավորում է ստացել ՊԲ շարքային զինծառայող 1992թ. ծնված Խաչատուր Մուրադի Ասլանյանը:

Ինչպես «Երկիր»-ին տեղեկացրեց ԼՂՀ ՊԲ մամուլի խոսնակ Սենոր Հասրաթյանը` վիրավորների վիճակը գնահատվում է բավարար, իսկ հրադադարի ռեժիմի խախտման դեպքեր գրանցվել են նաեւ երեկ եւ այսօր: «Հակառակորդը սովորության համաձայն դարձյալ խախտել է հրադադարի ռեժիմը, սակայն մեր պատասխան գործողությունների արդյունքում լռել է»,- ասաց Սենոր Հասրաթյանը: