Նոր բակտերիան սոսնձում է բետոնը

Բրիտանացի գիտնականները հայտնագործել են մի մանրէ, որը, հատուկ «սոսինձ» արտադրելով, կարող է բետոնե կառույցները իրար ամրացնել:

Գենետիկորեն ձևափոխված միկրոբը այնպես է ծրագրավորվել, որ կարողանա բետոնը կառույցների մեջ եղած ճաքերով լողալ ներքև: Երբ մանրէն հասնում է ճեղքի հատակին, սկսում է արտադրել կալցիումի կարբոնատի և մանրէական սոսնձի խառնուրդ, ինչը «սոսնձում է» բետոնը:

Ծրագրի ղեկավարներն ասում են, որ «սոսնձող» մանրէն կարող է օգտակար լինել հատկապես ետերկրաշարժային գոտիներում, որտեղ շինությունները ամրացման խիստ կարիք ունեն: Մինչ այս հայտնագործությունը՝ ճեղքերը նորոգելու ոչ մի այլ դյուրին միջոց չէր հայտնաբերվել:

«Սոսինձ-մանրէի» նախագիծն իրագործել են Նյուքասլի համալսարանի ուսանողներ՝ որպես ԱՄՆ-ում տեղի ունեցած գիտությունների խոշոր միջազգային մրցույթի մաս: