Բալահովիտից 10 երեխա հիվանդանոց չի տեղափոխվել. համայնքապետ

Կոտայքի մարզի Աբովյան խոշորացված համայնքի Բալահովիտ բնակավայրից 10 երեխա հիվանդանոց չի տեղափոխվել։ Այս մասին Sputnik Արմենիա-ի հետ զրույցում ասել է Աբովյան համայնքի ղեկավար Էդուարդ Բաբայանը։

Ավելի վաղ հայտնի էր դարձել, որ Բալահովիտ գյուղում 10-ից ավելի երեխա տեղափոխվել են տարբեր հիվանդանոցներ։ Նա գրել էր, որ Բալահովիտի ջրատարն այնքան կեղտոտ է, որ այդ տիրող գարշահոտի և մլակների պատճառով գյուղի երեխաների մոտ առողջական խնդիրներ են առաջանում։

«Ես ամեն ինչ ճշտել եմ․ միայն մի երեխա է հիվանդանոց տեղափոխվել, բայց նրա մոտ ալերգիա է։ Դա էլ տարբեր պատճառներից կարող է լինել ու հստակ ասել, թե դա ջրատարի, փոշու, թե որևէ միջատի կծելու հետևանք է՝ չգիտենք»,- ասաց Բաբայանը։

Խոսելով հենց ջրատարի խնդրից՝ համայնքապետը ասաց՝ հարցը Ջրային կոմիտեի տիրույթում է, բայց համայնքապետարանն է ամեն տարի մաքրում այն։ Նա նաև հավելեց, որ բնակիչների մի մասը կոյուղիներն են միացրել ջրատարին, ու խնդրի մեջ մեղավոր են նաև բնակիչները։

Բաբայանի խոսքով՝ իրենք դեռ սեպտեմբերին Ջրային կոմիտե գրություն են ուղարկել ջրատարը մաքրելու համար, բայց դեռևս պատասխան չկա։