Ռուսաստանի և Ադրբեջանի հարաբերություններն արագ կկարգավորվեն. դիտարկում

Մեդիափորձագետ Նաիրի Հոխիկյանը գրում է.

«Ադրբեջանի և Ռուսաստանի միջև տեղի ունեցող լարվածությունը շատ հայերի մոտ ոգևորություն է առաջացրել, թե ուր որ է ռուսները կհարձակվեն Ադրբեջանի վրա, Արցախն էլ կվերցնեն, մեզ կտան։ Ոմանք էլ չարախնդում են, թե տեղն է ռուսներին, որ ժամանակին մեր կողմից չկռվեցին թուրքերի դեմ։

Իրականում պետք չէ միամիտ լինել։ Ռուսաստանի և Ադրբեջանի հարաբերությունները ինչքան արագ ու ակնթարթորեն լարվել են, նույնքան արագ էլ կկարգավորվեն, երբ տեղի ունենա, ասենք, Պուտին-Ալիև հեռախոսազրույց ու քննարկվի «երկու բարեկամ երկրների պատմական համերաշխության» հարցը։

Հիմա Ադրբեջանը մկաններ է ցույց տալիս Ռուսաստանին' ունենալով Թուրքիայի, Մեծ Բրիտանիայի, Ֆրանսիայի, Գերմանիայի, Իսրայելի աջակցությունը։ Կլինի քաղաքական առևտուր, կողմերը կթուլանան ու հաճույք կստանան։

Ռուսաստանը մեծ կայսրություն է, որի գործողությունները իրականացվում են դանդաղ և ժամանակային մեծ տարածքի վրա' մանրամասն հաշվարկելով զարգացումները։

Թեպետ ռուս-թուրքական (ադրբեջանական) հարաբերությունները հիմա ծայրահեղ լարվելու և բախման հասնելու նախադրյալներ չկան, բայց սրանք բոլորը հիմքեր են' 2035-ին սպասվող աշխարհի 7-րդ վերաբաժանման ժամանակ Ուկրաինայի պատմությունը հենց Թուրքիայի և Ադրբեջանի ձեռամբ անելու համար։

Մենք պիտի պատրաստվենք 2035-ին, իսկ դա սկսվում է այսօրվանից»։