Կկարգավորվեն սպանդանոցներում, ձկնաբուծական տնտեսություններում անասնաբուժական ստուգումները

Կառավարության վաղվա նիստի օրակարգում գյուղատնտեսության նախարարությունը ներառել է որոշման փոփոխություն, որը պայմանավորված է անասնապահական ֆերմաներում, սպանդանոցներում, ձկնաբուծական տնտեսություններում անասնաբուժական ստուգումների իրականացման անհրաժեշտությամբ:

Այդ իրավական ակտով  սահմանվում են լիազոր մարմնի ներկայացուցիչների կողմից անասնաբուժության բնագավառում գործառնություններ իրականացնող տնտեսվարողների մոտ ստուգաթերթերի միջոցով ստուգումների իրականացման նորմատիվային պահանջները, որը կարևորագույն քայլ  կհանդիսանա սննդամթերքի անվտանգության  միջազգային չափանիշների և պահանջների ներդրման գործընթացում: Նախագծի ընդունմամբ կկարգավորվեն անասնաբուժության ոլորտում գործունեություն իրականացնող անձանց առկա խնդիրները:

Նախագիծը նպատակ ունի ազգային հսկողության և տվյալ ոլորտի շահառուների շրջանում կանոնակարգելու Հայաստանի Հանրապետությունում անասնապահական ֆերմաներում, սպանդանոցներում, ձկնաբուծական տնտեսություններում անասնաբուժական ստուգումների իրականացումը: Պետական քաղաքականության շրջանակներում անասնաբուժության վերահսկողության  բնագավառում ընդունվում է ազգային նոր իրավական փաստաթուղթ:

Նախագծի ընդունմամբ ակնկալվում է անասնաբուժության բնագավառում ստուգումների բարելավում, պարզեցում, թափանցիկություն, ռեսուրսների խնայում, ռիսկերի գնահատման համար անհրաժեշտ տեղեկատվության բազայի ստեղծում, որի արդյունքում  արդյունավետ և հետևողական վերահսկողություն կիրականացվի, ինչպես նաև չի խոչընդոտի տնտեսավարող սուբյեկտների իրավունքները և օրինական շահերը: